Index

శ్రీ విష్ణు సహస్రనామ అంతరార్థము

నామం	అంతరార్థము
అతీంద్రియః మహామాయః మహోత్సాహః మహాబలః	మధువులాంటి ఆ అమృతత్త్వాన్ని అందుకొంటే ఈశ్వరుడిలాగా ఈజీవుడూ అతీంద్రియుడవుతాడు. మాయకధీనుడు కాక అధీశుడవుతాడు. గొప్ప ఉత్సాహాన్ని బలాన్నీ పుంజుకుంటాడు.
మహాబుద్ధిః మహావీర్యః మహాశక్తిః మహాద్యుతిః	అంతేకాదు, పరిపూర్ణమైన బుద్ధి లేదా జ్ఞానం - సమగ్రమైన వీర్యం. సమగ్రమైన శక్తి అలవడతాయి. అంతరమైనది వీర్యమయితే బాహిరమైనది శక్తి. వీటితోపాటు అద్భుతమైన ద్యుతి అంటే తేజస్సు కూడా లభిస్తుంది. ఇవన్నీ షాడ్గుణ్యం క్రిందికి వస్తాయి. ఈశ్వరుడిలో ఉన్న ఈ గుణాలే జీవుడికీ సంక్రమిస్తాయి.
అనిర్దేశ్యవపుః శ్రీమాన్	నిర్దేశించటమంటే చూపటం. వపువంటే శరీరం. ఫలానా అని చూపటానికి లేదా విగ్రహం, గుణాత్మకం కాదది. శ్రీ అంటే శక్తిరూపంగా అమూర్తమై ఉందా తత్త్వంలో. శ్రీమంతమైన ఆతత్త్వం నిరాకారం.
అమేయాత్మా మహాద్రి ధృక్	కనుకనే అది జీవుడి విగ్రహంలాగా మేయం కాదు. కొలమానాని కందదు. అమేయమైన చైతన్యం. నేననే భావంతో ఉన్న ఆత్మ స్వరూపం. అద్రి ఎప్పుడూ ద్రవించని చలించని అయినా చలించి అన్నింటినీ కబళించే మాయాశక్తి చేత ధృక్ అప్రధృష్యమది.
మహేష్వాసః మహీభర్తా శ్రీనివాసః సతాంగతిః	ఇష్వాసమంటే బాణాసనం. ధనుస్సు, గొప్ప బాణాసనమా మాయాశక్తి. అది విసరిన ఒక బాణమే ఈ భూతత్త్వం, మహి. ఈమహిని అది మరలా భరించే ఉన్నది. శ్రీనివాస. శ్రీలోనే నివసిస్తున్నదీ భూ. అవ్యక్తమైతే శ్రీ. వ్యక్తమైతే భూ, ఇది గుర్తించిన వివేకవంతులే సంతః - వారికి గతిః గమ్యమదే.

Page 21

బ్రహ్మశ్రీ యల్లంరాజు శ్రీనివాస రావు