Index

శ్రీ విష్ణు సహస్రనామ అంతరార్థము

నామం	అంతరార్థము
భ్రాజిష్ణుః భోజనమ్ భోక్తా	ఈ చెప్పిన అన్ని దశలతో భ్రాజిష్ణు ప్రకాశిస్తూ ఇటు భోజ్యమైన ప్రపంచమై-అటు దీన్ని భక్షించే భోక్తా అంటే అన్నమూ అన్నాదుడూ రెండూ తానే అయి కూచున్నాడాయన. అన్న మంటే గ్రాహ్యం. అన్నాద అంటే గ్రాహకం. గ్రాహ్య గ్రాహకాలు రెండూ పరమాత్మేనని భావం.
సహిష్ణుః జగదాదిజః	అన్నింటినీ సహించే స్వభావమున్నవాడాయన. జగత్తుకంతా ఆదిలోనే సిద్ధమయి ఉన్నాడాయన. తనలో నుంచి జన్మించిన జగత్తును భరించటంలో ఆశ్చర్యమేముంది.
అనఘః విజయః జేతా	ఈ జగత్తునింతగా భరిస్తున్నా అనఘుడే, అఘమంటే అంటుకొనే దోషం, నిరాకారుడు గనుక దీని అంటు సొంటు లేదాయనకు. అదే ఆయన విజయం. దీనిచేత జితుడు కాడు, మీదు మిక్కిలి దీనికే జేత.
విశ్వయోనిః పునర్వసుః	విశ్వుడంటే జీవుడు. ఈ జీవుడికి యోని, వీణ్ణి సృష్టించినవాడని అర్థం. సృష్టించటమంటే వీడాయనకు విజాతీయుడు కాడు మరలా. ఈ జీవుడి రూపంలో పునః మాటి మాటికీ వసుః ఈ జరాయుజాది ఉపాధులలోకి వచ్చి నివసిస్తున్న వాడా ఈశ్వరుడే.
ఉపేంద్రః	ఇంద్రుడంటే జీవుడు (ఇదం ద్రః ఇతి) ఈ జీవుడికి చాలా దగ్గరగా ప్రత్యగ్రూపంగా ఉన్నవాడు గనుక ఉపేంద్రుడాయన.
వామనః ప్రాంశుః	అయితే జీవుడు గుర్తించనంతవరకూ వామనుడు. హ్రస్వ మైనదా రూపం. గుర్తించే కొద్దీ పెరిగి పెద్దదై ప్రాంశువు అంటే అత్యున్నతంగా భాసిస్తుంది.

Page 19

బ్రహ్మశ్రీ యల్లంరాజు శ్రీనివాస రావు