తదతీవ న్యాయ విరుద్ధం వచనం - తర్హి కధమివ జ్ఞానం నః ఆవిర్భవతి జనన కాలే కధమివచ మరణకాలే పునరస్తం గచ్ఛతి - ఇత్యను యోగః తస్యోత్తర ముచ్యతే - న జననం నామ అభావ భూతస్య చైతన్యస్య ఆవిర్భావః నాపి మరణం తస్య భావ భూతస్య అభావ ప్రాప్తిః - కింతు అవ్యక్తస్య వ్యక్తావస్థా జన్మ – వ్యక్తస్య పునరవ్యక్త దశాపత్తి ర్మరణ మితి అవధారణీయం .తధాహి అవ్యక్తాదీని భూతాని - అవ్యక్త నిధనానీతి భగవానేన ఉవాచ తన్న విస్మర్తవ్యం - సాచ వాసనారూపా అవ్యక్తదశా జ్ఞానస్య - జన్మనః ప్రాజ్ఞ్మరణస్యచ పశ్చాత్సా దశా అనువర్తతే తయో రంతరాళే జీవద్దశాయాం సైవ వాసనా వృత్తి రూపేణ పరిణతా తత్తద్వ్యాపార కలాపం నిర్వర్తయతి వాసనా దశాయా మసంలక్ష్యమాణత్వా దస్తమితమితి మన్యామహే వయం – వృత్తికాలే పునరస్తీతి తదేవ అభిమన్యామహే
యధా సూర్యస్య ఉదయాస్తమయౌ తధేమౌ మంతవ్యౌ - న ఖలు సూర్యః ప్రతిదినం హఠాదుదేతి నాపి ప్రతిరాత్ర మస్తముపైతి - కిం త్వస్త్యేవ సర్వదా అసౌ స్వరూపేణ ప్రకాశమానః కింతు భూమేరస్యాః పరిభ్రమణేన ప్రతిభాతినః ఉదయాస్తమయా వశ్నువాన ఇవ - బుద్ధితంత్రోయం వ్యవహార స్సర్వోపి - అస్మాకం బుద్ధే రియం భ్రాంతి రవివేకా త్సూర్యమండలే అధ్యారోప్యతే - వస్తుతస్తు న సూర్యః పరిభ్రమతి - స తదైవావతిష్ఠతే సదా - ఏవ మిహాపి ఆత్మచైతన్యం యధావదవ తిష్ఠతే సౌర ప్రకాశ ఇవ - కేవల మియ మస్మాకం బుద్ధి వృత్తి ర్భూమిరివ పరిభ్రమంతీ స్వకీయాం వృత్తి మరోపయతి తస్మి న్నవివేకవశాత్
Page 33
బ్రహ్మశ్రీ యల్లంరాజు శ్రీనివాస రావు