సామాన్య మేవ వర్తతే అస్తి భాతీతి - తధాహి యత్కించి లోకే పశ్యత్వం తదస్తీతి స్ఫురతీత్యేవ ఉపలభ్యతే - న తదతిరిక్తం కిమపి - యదతిరిక్త మివ ప్రతిభాతి తదప్యస్తీత్యేవ ప్రతీయతే ననాస్తీతి - యదినాస్తి నైవోపలభ్యతే తత్ - కింతు ఉపలభ్యత ఏవ - అతః అస్తీ త్యుపలంభా దృతే న కించి దణుమాత్రమపి ద్రష్టుం శక్యతే - యద్యేవం జీవో జగదితి విశేష రూపేణ కధం నామ ప్రతిష్ఠాం లభతే తదప్యాత్మైవ సామాన్య రూపం స్యా దవశ్యం నాన్యత్తతో భవితుమర్హతి - తధాపి ఆత్మేతి అభిజ్ఞానాభావా త్తతోన్యదివ తదుభయం ప్రతిభాతి రజ్జుసర్పవత్
తస్మాదుభయ మేతద్వస్తుతః ఆత్మైవేతి పునరస్మాన్ బోధయితుం సృష్టి ప్రవేశౌ ద్వావపి అధ్యారోప్యేతే ఆత్మని - తత్ర సృష్టి ర్జగతః ప్రవేశో జీవస్య అవిద్యమానావపి విద్యమానవత్ జగదిదం చరాచరాత్మకం యస్మా దాత్మనః ఉత్పద్యతే యస్మిన్న వతిష్ఠతే యస్మిన్నంతతః ప్రవిలీయతే - ఇతి వర్ణయిత్వా కార్య కారణ సంబంధం కల్పయతి జగదాత్మ నోరపి ద్వయోః తత్ర కార్యమిదం జగద్యదా త్రిష్వపి కాలేషు కారణేనైవ ఆత్మచైతన్యేన అవినాభూతం వర్తతే తదా తద్వ్యతిరేకేణ న భవతి యధా మృద్వ్యతిరేకేణ ఘటః - అతః ఆత్మైవ అనాత్మ జగద్రూపేణ అవభాసతే ఇత్యాపతతి యధా మృతికైవ ఘట శరావాది రూపేణ - ఏవం జగదేత దాత్మ స్వరూపేణ ప్రతిపత్తుం శక్నోతి సాధకః
జగత్యేవ మాత్మ స్వరూపేణ విలీయమానే జీవ ఇదానీ మవశిష్యతే సోపి జీవో నాన్యః ఆత్మనః - కింతు ఆత్మైవ జీవ రూపేణ ప్రవిష్ట ఇతి
Page 21
బ్రహ్మశ్రీ యల్లంరాజు శ్రీనివాస రావు