Index

శ్రీ విష్ణు సహస్రనామ అంతరార్థము

నామం	అంతరార్థము
ఆత్మవాన్	అసలీ పనికూడా ఆయన స్వరూపమే. మనమేమిటి. మన పనులేమిటి, అనాత్మ ఎక్కడ ఉంది. అంతా ఆత్మదే-ఆత్మే.
సురేశః శరణమ్ శర్మ	మన మానవులేమిటి - సురలు స్వయం ప్రభువులమని విఱ్ఱవీగే దేవతలకు కూడా ఈశ్వరుడాయన. దేవ మానవ దానవులందరికీ శరణ్యుడు, వారందరి అనుభవానికీ వచ్చే శర్మ-సుఖ స్వరూపుడు.
విశ్వరేతాః ప్రజాభవః	అచేతనమైన ఈ విశ్వానికంతా రేతస్సు-బీజస్వరూపుడు, పోతే చేతనమైన ప్రజా కోటికంతా భవ-జన్మకారకుడు. చేతనా చేతనాలు రెండింటికీ ఉపాదానమూ నిమిత్తమూ రెండూ పరమాత్మే.
అహః సంవత్సరః వ్యాళః	అహస్సులాగా ప్రకాశిస్తూనే ఉంటాడెప్పుడూ, అంటే నామ రూపాత్మకంగా గోచరిస్తూనే ఉన్నాడు. సంవత్+సర-నిత్యమూ కదులుతూ మెదులుతూనే ఉన్నాడు జీవరూపంగా. అయినా వ్యాళ అంటే శఠుడు. గూఢ విప్రియకృత్ శఠః అన్నారు. మన కనులు కప్పి తప్పించుకొని పోతుంటాడు.
ప్రత్యయః సర్వదర్శనః	ప్రతి+అయ మరలా వెనుకకు తిరిగి ప్రత్యగ్దృష్టితో చూడగలిగితే ప్రతి+అయ - మన దృష్టికే ఎదురుపడతాడు. అప్పుడీ సర్వ ప్రపంచమూ దృశ్యంగా కాదు- దర్శనంగానే భాసిస్తుంది.
అజః సర్వేశ్వరః సిద్ధః	అలాంటి దర్శనంతో ఆయనలాగా మనమూ అజులమే. జన్మించామని గాని జన్మించబోతామని గాని భావమే ఉండ బోదు. సర్వమూ కనిపిస్తున్నా దానికి బద్ధులం కాము. ఈశ్వరులమే. ఒక్క మాటలో చెబితే సిద్ధులం.

Page 15

బ్రహ్మశ్రీ యల్లంరాజు శ్రీనివాస రావు