అహ అద్వైతామృత సారః న కదాపి స్వరూపా చ్చ్యవతే - నచ విక్రియతే - కింతు యదిదం జ్ఞేయం తేన గృహ్యమాణం తత్తు ద్విపాత్రాభినయం కుర్వ దివ ప్రతీయతే నిర్వికల్పం భవతి - తద్విపర్యయేణ సవికల్ప మపి భవతి
తత్ర నిర్వికల్పం జ్ఞేయం నాన్యత్సత్తాయాః - కేవలా సత్తా నిర్వికల్పైవ సదా యధా తద్ గ్రాహకం జ్ఞానం - కింతు తద్విశేషా యే నామ రూప క్రియాదయ స్తేతు సవికల్పాః పరిణమ మానత్వాత్ - తేషాం సత్తా యద్వా అస్తిత్వం – నిర్వికల్పం సామాన్యభూతం - సర్వేష్వపి తేషు పదార్ధ విశేషేషు అనువర్తమానం - సదితి తదేవోచ్యతే శబ్దాంతరేణ - తద్రోహకం జ్ఞానమపి చిదితి అభిధీయతే - ఏతే చిత్సతీ యావ త్పరస్పరం సంబధ్యేతే తావన్న కాపి సమస్యా - నిరాకారత్వాత్ వ్యాపకత్వా దేకరూపత్వా తయోః - తదా తతోతిరిక్తం నకించి దుపలభ్యతే నామవా రూపంవా క్రియావా ద్రష్టుమపి–
పరంతు మమ తవచ జ్ఞానం తావతా న తృప్తిం భజతే - న సత్తా మాత్రం కింతు సద్విశేషాన్ చరాచర పదార్థాన్ ద్రష్టుం తై స్సహ వ్యవహర్తుం ఉత్సహతే త ఏవే మే కళత్ర పుత్రాదయః వస్తు వాహనాదయః తత్సంబంధినో మనసి జాయమానాః తాస్తా ఆలోచనా అపి - తత్రాపి శోచనీయ మేతత్ యదేక తమేన తేషాం విశేషేణా మనేన శరీరాది సంఘాతేన తాదాత్మ్య ముపగతం జ్ఞాన మస్మాకం తదేవాహమితి అభిమన్యతే - యత ఏవం తతో నిర్గంతుం కధమపి న క్షమతే - అయమేవ మిధ్యాత్మా నామ - అధయే కళత్ర పుత్రాదయో వస్తువాహనాదయ స్సంతి తేష్వపి అత్యంత మనురక్తిం భజమానం తతోపి ఆయస పంజరాదిన మోచయితు మాత్మానం న పారయతి - తత్ర తత్రైవ పరివర్తతే - గౌణాత్మేతి అయమేవ
Page 48
బ్రహ్మశ్రీ యల్లంరాజు శ్రీనివాస రావు