సర్వగతత్వాచ్చ - నహి సిద్ధం వస్తు పున ర్నిష్పాదయితవ్యం - నచ ఆకాశ వత్సర్వగతం తత్ కుత్రాపి గత్వా ప్రాప్తవ్యం భవతి - అతః ఆత్మవిషయే కర్మణో నావకాశః -- అపిచ కర్తృక్రియా కారకఫలాది భేదబుద్ధి మాశ్రిత్య సర్వం కర్మ ప్రవర్తతే - సర్వమాత్మైవేతి నిర్ధారితే క్వకర్తా క్వకారకం క్వచతదతి రిక్తం ఫలం - యద్యభి న్నేపి తత్త్వే భిన్నత్వ మాపాద్యతే తత్కేవలం మృషైన
ఏవ ముపాసనాపి న సంగచ్ఛతే - కిమియ ముపాసనా నామ నను ధ్యానమేవ - ధ్యాతా ధ్యేయ మితి ద్వయోః సంబంధ ఏవ ఖలు ధ్యానం నామ - తత్ర ధ్యేయ మితి కాచి దిష్ట దేవతా - సాచ ఆత్మైక దేశః కోపి చైతన్య శక్తి శకలః - సోపి ధ్యాతుస్తవ జీవస్య అన్యఏవ - న అనన్యః ధ్యానమపి ద్వయో ర్మధ్యే అన్యైవ కాపి క్రియా - ఏతాదృక్ భేద దృష్టిః - కధమివ తే జనన మరణాది సమస్యా మ పాకరోతి - విశేష రూపత్వా దృష్టే స్తవ విశేషరూపాం తాం ప్రత్యుత ఉపోద్బల యత్యేవ - యస్మా ద్విశేషస్య విశేషో సపరిష్కారః - సామాన్యమేవ సర్వస్యాపి విశేషజాతస్య ప్రవిలాపనాయ సమర్ధం భవతి
ఏవమేవ యోగాభ్యాసోపి అకించిత్కరః "యోగ శ్చిత్తవృత్తి నిరోధ” ఇతి యోగినో వదంతి - చిత్తమితి నైక రూపం - యావంతో మనుష్యా స్తావంతి చిత్తాని – తత్ర పరశ్శతాః పర స్సహస్రా శ్చ వృత్తయః ప్రతి క్షణం జాయమానా భవంతి పరస్పర విలక్షణాః - తాస్సమస్తాః కేన నిరోధ్ధవ్యాః నిరుద్ధాః పున ర్నోత్పద్యంత ఇతి కో విశ్వాసః - అపిచ నిరుద్ధా అపి క్వయాంతి తాః యదా ఆత్మచైతన్య మేవ సర్వత్ర జాగర్తి- బహిర్యాతా అపితా ఆత్మన్యేవ అంతర్భవేయుః - తర్హి ఆత్మైవ తావృత్తయః నాన్యా ఇతి
Page 26
బ్రహ్మశ్రీ యల్లంరాజు శ్రీనివాస రావు